മേൽഭാഗം പച്ചനിറത്തിലുള്ള ഇവയുടെ ചിറകുകൾ നീലനിറം കലർന്നതാണ്. അരപ്പട്ടയിലും വാലിലും നീലനിറവും താടിയിൽ മഞ്ഞനിറവുമുണ്ട്. തൊണ്ട തവിട്ടുകലർന്ന ചുവപ്പുനിറത്തോടുകൂടിയതാണ്. വാൽമേൽമൂടിയുടെ മധ്യത്തിലെ തൂവലുകൾ നീളം കൂടിയതാണ്. അടിഭാഗം മഞ്ഞകലർന്ന പച്ചനിറത്തോടുകൂടിയത്. കീഴ്വാൽമൂടിക്ക് ഇന്ദ്രനീലനിറമാണ്. കണ്ണിനു കുറുകെ വീതികൂടിയ കറുപ്പുനിറമുള്ള ഒരു വര കാണാം. കൊക്ക് അല്പം താഴോട്ടു വളഞ്ഞതും കറുത്തതുമാണ്. വെള്ളക്കെട്ടുകൾക്കു സമീപവും തുറസ്സായതും മരങ്ങൾ കുറഞ്ഞതുമായ കാടുകളിലും കാണപ്പെടുന്നു.