ബ്രൗൺ കലർന്ന ചാരനിറത്തോടുകൂടിയ തൂവൽപ്പൂടയാണ് ഇവയ്ക്ക്. തൊണ്ടയിൽ മഞ്ഞനിറത്തിലുള്ള ഒരു പാടുണ്ട്. ആൺപക്ഷികൾക്ക് തോളിൽ ഇരുണ്ട തവിട്ടുനിറത്തോടുകൂടിയ പാടും വശങ്ങളിലെ ചിറകുകളിൽ രണ്ടു വെള്ളവരകളും കാണാം. പെൺപക്ഷികൾക്ക് തൊണ്ടയിൽ മഞ്ഞനിറമില്ല; തോളിലെ പാട് വിളറിയ നിറത്തിലുമായിരിക്കും. ചിറകുകളിലെ പാട് മങ്ങിയ മഞ്ഞനിറം കലർന്നതാണ് ഇവയ്ക്ക്. വരണ്ട കാടുകളിലും കൃഷിയിടങ്ങളിലും തോട്ടങ്ങളിലും കണ്ടുവരുന്നു.